कुलानन्द यादव, सिराहा, कार्तिक ८ । भगवानपुर गाउँपालिकाद्वारा आयोजित दोस्रो अध्यक्ष कप क्रिकेट प्रतियोगिताको अन्तिम खेलमा लहान नगरपालिकाले नवराजपुर गाउँपालिकालाई पराजित गर्दै उपाधि जितेको छ। रोमाञ्चक र प्रतिस्पर्धात्मक खेलमा लहान नगरपालिका विजेता बनेको हो भने नवराजपुर गाउँपालिकाले उपविजेतामा चित्त बुझाएको छ।
प्रतियोगिताअन्तर्गत आज सम्पन्न फाइनल खेलमा लहान नगरपालिकाले पहिले ब्याटिङ गर्दै १७६ रनको लक्ष्य प्रस्तुत गरेको थियो। जवाफमा ब्याटिङ गरेको नवराजपुर गाउँपालिकाले प्रतिस्पर्धात्मक प्रदर्शन गर्दै ११८ रन बनाउन सफल भयो। तर निर्धारित लक्ष्य पूरा गर्न नसक्दा नवराजपुर गाउँपालिका उपाधि जित्नबाट वञ्चित भयो। यससँगै लहान नगरपालिकाले दोस्रो अध्यक्ष कप क्रिकेट प्रतियोगिताको उपाधि आफ्नो नाममा गर्न सफल भएको छ।
प्रतियोगिताको समापन तथा पुरस्कार वितरण कार्यक्रम भगवानपुर गाउँपालिकाका अध्यक्ष उग्रनारायण यादवको अध्यक्षता र संघीय सांसद माननीय बब्लु गुप्ताको प्रमुख अतिथि र विशिष्ट अतिथिमा अनुसन्धानका प्रहरी नायब उपरीक्षक (डीएसपी) रामरिझन यादव लगायतकाे उपस्थितिमा सम्पन्न भएको थियो। कार्यक्रममा विजेता तथा उपविजेता टोलीलाई नगद पुरस्कारसहित ट्रफी र मेडल प्रदान गरी सम्मान गरिएको थियो।
प्रतियोगितामा विजेता बनेको लहान नगरपालिकाले १ लाख रुपैयाँ नगदसहित ट्रफी र मेडल प्राप्त गरेको छ। त्यसैगरी, उपविजेता नवराजपुर गाउँपालिकाले ७५ हजार रुपैयाँ नगदसहित ट्रफी र मेडल प्राप्त गरेको छ।
प्रतियोगिताले स्थानीय तहका खेलाडीहरूलाई आफ्नो खेलकौशल र प्रतिभा प्रदर्शन गर्ने महत्त्वपूर्ण अवसर प्रदान गरेको छ। विभिन्न स्थानीय तहका टोलीबीच भएको प्रतिस्पर्धाले खेलाडीहरूमा खेलभावना, अनुशासन, आपसी सद्भाव र सहकार्यको भावना विकास गर्न सहयोग पुर्याोएको छ।
स्थानीय स्तरमा क्रिकेटप्रतिको आकर्षण बढ्दै गइरहेको अवस्थामा यस्ता प्रतियोगिताले नयाँ प्रतिभाको पहिचान गर्न तथा खेलाडीलाई भविष्यमा थप अवसर प्राप्त गर्न प्रेरित गर्ने अपेक्षा गरिएको छ। खेलकुदको विकासका लागि स्थानीय सरकारबाट हुने यस्ता आयोजनाले ग्रामीण क्षेत्रमा लुकेर रहेका प्रतिभालाई उजागर गर्नसमेत महत्त्वपूर्ण भूमिका खेल्न सक्छन्।
दोस्रो अध्यक्ष कप क्रिकेट प्रतियोगिताको उपाधि जितेको लहान नगरपालिकालाई बधाई दिँदै उपविजेता नवराजपुर गाउँपालिकाको प्रदर्शनको पनि प्रशंसा गरिएको छ। प्रतियोगिताले स्थानीय तहबीच खेलकुदका माध्यमबाट आपसी सम्बन्ध र एकता मजबुत बनाउन योगदान पुर्यााएको छ।
स्थानीय खेलाडीको क्षमता अभिवृद्धि, क्रिकेट खेलको प्रवर्द्धन तथा खेलकुद संस्कृतिको विकासमा यस्ता प्रतियोगितालाई आगामी दिनमा पनि निरन्तरता दिनुपर्ने आवश्यकता देखिएको छ।
_1766318749.png)
