मनु यादव निरज : सिरहा । सिरहाको भगवानपुर गाउँपालिका–३ धाँतीस्थित दशगजा नजिकबाट भारततर्फ अवैध रूपमा लैजान लागिएको २१ लाख २७ हजार २१० रुपैयाँ बराबरको मदिरा र भारतीय नम्बर प्लेटको कार सशस्त्र प्रहरीले बरामद गरेको छ।
सशस्त्र प्रहरी बल नेपाल नं. ७ गण हेडक्वार्टर सिरहाका गणपति सशस्त्र प्रहरी उपरीक्षक (एसपी) सुमनजंग थापाका अनुसार बिहीबार बिहान करिब ७:०५ बजे सीमा सुरक्षा गुल्म हेडक्वार्टर इनर्वाबाट सशस्त्र प्रहरी निरीक्षक रामेश्वर रामको कमाण्डमा खटिएको ९ सदस्यीय मोबाइल गस्ती टोलीले विशेष गस्तीका क्रममा उक्त कार नियन्त्रणमा लिएको हो।
प्रहरीका अनुसार DL 7CH 9792 नम्बरको भारतीय नम्बर प्लेट भएको सेतो मारुती सुजुकी कारमा मदिरा राखेर नेपालबाट भारततर्फ अवैध रूपमा लैजाँदै गर्दा गस्ती टोली पुगेपछि चालक कार र सामान छाडेर फरार भएका थिए।
बरामद गरिएको सामानमा ५८ कार्टुन कस्तुरी मदिरा, ७ कार्टुन अर्ना क्यान बियर, ३ कार्टुन बाह्रसिङ्गे बियर तथा १३ बोतल ब्ल्याक AOK मदिरा रहेका छन्। बरामद कारको अनुमानित मूल्य २० लाख रुपैयाँ र मदिराको मूल्य १ लाख २७ हजार २१० रुपैयाँ रहेको सशस्त्र प्रहरीले जनाएको छ।
फरार चालकको खोजी भइरहेको तथा बरामद गरिएको कार र मदिरा आवश्यक कानुनी प्रक्रिया पूरा गरी सम्बन्धित भन्सार कार्यालयमा बुझाउने प्रक्रिया अघि बढाइएको एसपी थापाले जानकारी दिए।
_1766318749.png)
