कुलानन्द यादव / सिरहा असोज २७- सशस्त्र प्रहरी बल, नेपालले पुनः एक पटक सीमा सुरक्षामा आफ्नो सतर्कता र जिम्मेवारीको प्रमाण प्रस्तुत गरेको छ। सिरहाको भगवानपुर गाउँपालिका–४, ठाडी नाकामा खटिएको सशस्त्र प्रहरी टोलीले भारतबाट नेपाल प्रवेश गर्ने क्रममा एक युवकलाई चाँदी सहित नियन्त्रणमा लिन सफल भएको हो।
मिति २०८२ असोज २७ गते दिउँसो करिब १२:२० बजे, प्रस्तावित सीमा सुरक्षा गुल्म ईनर्वा, सिरहाबाट खटिएको टोलीले उक्त कारबाही सम्पन्न गरेको हो। टोलीमा सशस्त्र प्रहरी नायब निरीक्षक (स.प्र.ना.नि) इन्द्र नारायण चौधरीको कमाण्डमा ४ जना सशस्त्र प्रहरी खटिएका थिए।
सामान्य जाँचको क्रममा टोलीले भारत बिहार राज्य, मधुबनी जिल्ला, लौकही ग्रामपंचायत–४ निवासी २२ वर्षीय सुरज कुमारलाई शंकाको आधारमा रोकेर खानतलासी गर्दा करिब ४६० ग्राम चाँदीका सिक्री र औँठी फेला परेका छन्। बरामद चाँदीको अनुमानित बजार मूल्य रु. १,२६,९८३ बराबर रहेको सशस्त्र प्रहरी स्रोतले जनाएको छ।
बरामद गरिएको चाँदी र नियन्त्रणमा लिइएको व्यक्तिलाई आवश्यक कारबाहीका लागि सम्बन्धित भन्सार कार्यालयमा बुझाउने प्रक्रिया अघि बढाइएको छ।
सशस्त्र प्रहरी बल, नेपालले अवैध तस्करी, आपराधिक क्रियाकलाप र सीमा अपराध नियन्त्रणमा निरन्तर सक्रियता देखाउँदै आएको छ। प्रहरी स्रोतका अनुसार, “यो सफलता सीमा क्षेत्रमा प्रहरीको सतर्कता, अनुशासन र प्रतिबद्धताको प्रत्यक्ष उदाहरण हो।”
सशस्त्र प्रहरी बल, नेपालका अधिकारीहरूले यो कार्यलाई सीमा सुरक्षामा समर्पण र व्यावसायिक जिम्मेवारीको प्रतीकका रूपमा प्रशंसा गरेका छन्।
X
_1766318749.png)
