कुलानन्द यादव/सिरहा पुस ११:-जिल्लाका सत्य नारायण साफीको जीवनकथा कुनै साधारण सफलताको कथा होइन, यो इच्छाशक्ति, कठोर मेहनत र अडिग अठोटको जीवित उदाहरण हो। आर्थिक रूपमा कमजोर परिवारमा जन्मिएका सत्य नारायणका लागि जीवनको बाटो सजिलो थिएन। परिवारको दैनिकी चलाउन र आफ्नै खर्च जुटाउन उनी हरेक दिन करिब ९ घण्टा ज्याला मजदुरी गर्न बाध्य थिए।
सामान्यतया दिनभर मजदुरी गरेपछि पढाइ सम्भव नदेखिने अवस्था हुन्छ। तर सत्य नारायण साफीले यही सोचलाई आफ्नै व्यवहारबाट गलत सावित गरेर देखाए। सीमित साधन, अभावग्रस्त अवस्था र शारीरिक थकानका बीच पनि उनले आफ्नो लक्ष्यलाई कहिल्यै छोडेनन्। मजदुरीपछि बाँकी समय निरन्तर अध्ययनमा लगाउँदै उनले एमबीबीएस (MBBS) जस्तो अत्यन्तै कठिन र प्रतिस्पर्धात्मक परीक्षामा पूर्ण छात्रवृत्ति (फुल स्कलरशिप) सहित नाम निकाल्न सफल भए।
२४ घण्टामध्ये अधिकांश समय संघर्षमै बित्दा पनि उनको पढाइप्रतिको प्रतिबद्धता कहिल्यै कमजोर भएन। समयको अभाव, आर्थिक समस्या र मानसिक दबाब हुँदाहुँदै पनि उनको सपना सधैं जीवित रह्यो। शरीर थाक्थ्यो, मन कहिलेकाहीँ कमजोर हुन्थ्यो, तर लक्ष्यप्रतिको विश्वास कहिल्यै डगमगाएन। यही अडिग इच्छाशक्तिले उनलाई असम्भव ठानिएको लक्ष्यसम्म पुर्यायो।
सत्य नारायण साफीको सफलताले एउटा स्पष्ट सन्देश दिन्छ यदि लक्ष्य स्पष्ट छ, मनदेखि केही गर्ने दृढ अठोट छ र मेहनतसँग कहिल्यै सम्झौता गरिँदैन भने ‘असम्भव’ भन्ने शब्द केवल बहाना मात्र हुन्छ।
आज सत्य नारायण साफी संघर्षरत हजारौँ नेपाली युवाका लागि प्रेरणाको उज्यालो बनेका छन्। विशेषगरी आर्थिक रूपमा कमजोर पृष्ठभूमिबाट आएका विद्यार्थीहरूका लागि उनको यात्रा आशा र हौसल्यको स्रोत बनेको छ। उनको यो सफलताले शिक्षा र संकल्पको शक्तिलाई पुनः प्रमाणित गरेको छ जहाँ परिस्थितिभन्दा ठूलो मान्छेको सपना र मेहनत हुन्छ भन्ने सत्यलाई उनले आफ्नै जीवनबाट देखाइदिएका छन्।
X
_1766318749.png)
